كه‌سێتى گه‌ییو، كه‌سێتى گه‌نیو

محه‌مه‌د ته‌ها حوسێن
(گه‌ییو) ئه‌و كه‌سه‌یه‌ هه‌موو قۆناغه‌كانى گه‌شه‌ى به‌ هاوسه‌نگیى بڕیبێت و زه‌مین و زه‌مانى وه‌ك دوو ڕه‌هه‌ندى بنچینه‌یى له‌ پێكهاتنى وجوودیدا به‌یه‌كه‌وه‌ په‌یوه‌ست و لكاو بووبن. (كه‌سى گه‌ییو) باش به‌خێوكراوه‌، زۆر باشیش په‌روه‌رده‌ بووه‌، ئه‌وانه‌ى به‌رپرس بوون له‌ پێگه‌یاندنى له‌ سۆنگه‌ى بوونى پڕۆژه‌یه‌ك بۆ درووستكردنى ئینسانێك ئیشیان كردووه‌. بوونى هه‌لومه‌رجه‌كانى پێگه‌یاندنى كه‌سێتییه‌كى هاوسه‌نگ هه‌ر له‌ خۆوه‌ نایه‌نه‌ به‌ر ده‌ست، چاندنى مرۆڤ ئه‌ركێكى زه‌حمه‌تى ده‌روونى و كۆمه‌ڵایه‌تى و ڕۆشنبیرى و ئه‌خلاقییه‌، له‌ گه‌یینى مرۆڤێكدا چه‌ندین هۆكار ڕۆڵ ده‌بینن، هه‌موویان ده‌بێ تا ئاستێكى زۆر فه‌راهه‌م بن تاوه‌كو ئه‌وه‌ى دێته‌ ئارا له‌ هه‌موو ڕوویه‌كه‌وه‌ به‌یه‌كه‌وه‌ گونجاو بێت و سه‌ره‌نجام له‌ گه‌یینیدا چێژێكى باڵاى عه‌قلانى به‌ نێو ڕۆح و ڕه‌وانى چێنه‌ره‌كه‌یدا دێت و ده‌چێ هه‌ر لە چێژى داهێنان و هێنانه‌ ئاراى نه‌بوویه‌ك بۆ بوون ده‌چێ.
كه‌سه‌ گه‌ییوه‌كان هوشیارن به‌ جه‌سته‌ى خۆیان، به‌ ده‌روونى خۆیان، به‌ دۆخى كۆمه‌ڵایه‌تى و كولتوورى خۆیان، هوشیارن به‌ عه‌قڵ و ئاستى ژیریى خۆیان، ئه‌م جۆره‌ هوشیاریانه‌ نه‌مامێكى مرۆڤ ئاسامان بۆده‌گه‌یه‌ننه‌ قۆناغى به‌ردارى و به‌ فه‌ڕ و پیتى ده‌كه‌ن و گرووپ و تاقم و ده‌سته‌ى ساغ و گه‌ییو له‌ مرۆڤ ده‌گرێت و هێشوو هێشوو پێشكه‌شى كۆمه‌ڵگه‌كه‌ى خۆیانى ده‌كه‌ن.
گه‌ییو به‌ پلان و سیستمى گه‌شه‌كردندا تێپه‌ڕیوه‌، له‌ ده‌ره‌وه‌ى سیستم كه‌سێتى مرۆڤ ناگات و به‌ره‌كه‌ى كه‌ڵكى له‌گه‌ڵژیان و گوزه‌رانى نییه‌، سیستم و پلانى كه‌سێتیى گه‌ییو هه‌میشه‌ له‌سه‌ر ئاوازێكى هاڕمۆنیكدا نۆته‌كانى ژیانێكى درووست و ده‌روونێكى ساغ ده‌نووسێته‌وه‌.
زۆربه‌ى هه‌ره‌ زۆرى كه‌سێتییه‌كانى كۆمه‌ڵگه‌ى ئێمه‌ نه‌گه‌ییون، هه‌ر كاڵ و خاون، یا به‌ مانایه‌كى تر له‌ ڕووى په‌روه‌رده‌یى و كۆمه‌ڵایه‌تى و كولتوورى و ده‌روونى و سیاسى و …..تاد به‌ سووڕێكى ئاسایى پێگه‌یشتن و گه‌ییندا تێنه‌په‌ڕیون و هه‌ر بۆیه‌ش وه‌ك قه‌واره‌ى گه‌نیو گه‌نیو ڕۆڵ و پایه‌كانیان له‌ كۆمه‌ڵگه‌دا هه‌ڵده‌سووڕێنن و سه‌ره‌نجام جه‌سته‌یه‌كى كۆمه‌ڵایه‌تى و نه‌ته‌وه‌یى گه‌نیومان بۆ گه‌وره‌ ده‌بێ تا هه‌یه‌ هه‌ر به‌ گه‌نده‌خۆریى ژیانى خۆیى و تاكه‌كانى هه‌ڵده‌سووڕێن.
پێکهاتەی دەروونی و کومەڵایەتی کەسی (گەنیو) ترازاوە، لەڕووی پەروەردەییەوە شتێکی وا لەبارەی بوون بە ئینسان فێر نەبووە، ستراکتووری کولتووریشی ڕەنگدانەوەی جۆری پەروەردە و ڕاهاتنە کۆمەڵایەتیەکانیەتی، کەسە گەنیوەکان ئاسایی نین، کیمیای دەروونیان شڵەژاو و ترشاوە، کەڵکی ڕۆڵ و پایەی کۆمەڵایەتیان نییە، پێویستیان بە دابڕین هەیە بە مەبەستی چارەسەری گشتگیر، ئەم دەرەنجامە زانستییە و نیازی سەلماندنی دووبارەی ئەم ڕاستییەم هەیە.

كۆمێنت و لێدوان

بابه‌تی تر

سایکۆلۆژیای عاشق لای خۆمان

محمد تەها حسێن / مامۆستای زانکۆ لە سایکۆلۆژیای عاشقی لای خۆمان چاو تەنها یەک شت …